Jamii nawajieni                   Na ujumbe maalumu
Nataka mupulikeni              Muzidi kutakalamu
Waingiya Ramadhani          Mwezi  wetu wa saumu
Mtukufu Ramadhani           Tujumuike kaumu
 
Kati ya nguzo zetu             Tukumbuke Ramadhani
Sisi na vizazi vyetu            Tulihimizwa ayani
Na hata Mtume wetu         Katuhimiza jamani
Mtukufu Ramadhani          Tujumuike kaumu
 
Saumu ina makuu             Sababuze taweleza
Mwili wapata nafuu           Mlitambule la kwanza
Yatuonyesha matuu          Masikini wasoweza
Mtukufu Ramadhani          Tujumuike kaumu
 
Nao waso Isilamu              Kuijuwa walitaka
Maana hino  saumu           Isilamu waloshika
Walipoona kaumu              Wote wameamarika
Mtukufu Ramadhani          Tujumuike kaumu
 
Awali walielezwa               Mola katuamrisha
Ni shuruti kufuatwa           Katu hatuto kanusha
Na adhabuye n'kubwa      Wasiyo imairisha
Mtukufu Ramadhani          Tujumuike kaumu
 
Wakazidi uchunguzi           Kwa wingi na tahayuri
Wakajitweka makazi          Yaso yao makafiri
Wakaona ni vizazi              Wafungao kwa hiari
Mtukufu Ramadhani          Tujumuike kaumu
 
Hapo hawakukomeya        Ushupavu kuzidiwa
Saumu kuikemeya              Ina madhara makubwa
Kumbe wamekoseya          Ndio tiba yetu kubwa
Mtukufu Ramadhani           Tujumuike kaumu
 
Imedhihiri zamani               Tiba nzuri saumu
Uchafu wa matumboni        Na viini maalumu
Hata wana wavyuoni         Amri wame salimu
Mtukufu Ramadhani          Tujumuike kaumu
 
Miskitini Khalaka               Jamii huongezeka
Madarasa kadhalika          Elimu kuelimika
Sote twafaidika                  Hili ni kweli hakika
Mtukufu Ramadhani          Tujumuike kaumu
 
Kuna haya madhumuni     Ambayo 'taka wajuza
Imani tuzidisheni               Dini kutoipuuza
Si sharuti Ramadhani       Ndipo tukajitokeza
Mtukufu Ramadhani         Tujumuike kaumu
 
Wasiya n'nawapeni          Jamii i'l Islamiya
Tuwesote Ikhwani            Dini kuisimamiya
Tamuepuka shetwani      Wallahi nawaapiya
Mtukufu Ramadhani        Tujumuike kaumu
 
Kikomoni mewasili           Tamati nahitimiya
Jina langu la kamili          Abdalla Al'Sharifiya

Wa Takaungu asili          Kilifi nimekuliya
Mtukufu Ramadhani       Tujumuike kaumu