SWALI:

Assalamu alaikum warahmatullahi,

Hivi majuzi niliandika wasia wangu kama alivyo amrisha Mwenyezi Mungu na Mtume wake. Katika wasia wangu niliandika kuwa maiti yangu isikurubishwe moto hata pale nitakapo kuwa nimekwa chumbani katika kuoshwa na kukafiniwa. Watu wangu wakaniuliza jee pale tutakapo kukamua, tukufukize vipi? Sasa suala langu Mashekhe wangu liko hapa. Huku kukamuliwa, je ni mila, au ni madhehebu au ni sunnah?

JIBU:

Sifa zote njema Anastahiki Allaah Aliyetukuka Mola Mlezi wa walimwengu wote, Swalah na salamu zimshukie kipenzi chetu Mtume Muhammad (Swalla Allaahu ‘alayhi wa aalihi wa sallam) na Swahaba zake (Radhiya Allaahu ‘anhum) na watangu wema mpaka Siku ya Mwisho.

Shukrani zetu za dhati kwa swali lako kuhusu kukamuliwa wakati unaoshwa baada ya kuaga dunia. Vitabu mbalimbali maarufu vya Fiqhi kama Swahiyhu Fiqhus Sunnah cha Shaykh Abu Maalik, Minhaajul Muslim cha Shaykh Abu Bakr Jaabir al-Jazaairiy na pia al-Mulakhkhasw al-Fiqhiy cha Shaykh Dkt. Swaalih Fawzaan aal-Fawzaan.

Vitabu hivi ambavyo tumevitaja na venginevyo vinatueleza njia ambayo inafaa kufuatwa ili kumtayarisha Muislamu aliyekufa kwa mazishi. Katika moja ya njia hiyo ni kukamuliwa maiti ili kukamilisha tendo la kuoshwa, kuswaliwa na kisha kuzikwa. Lakini fahamu kuwa kukamuliwa huko si kukamuliwa kama wanavyofanya baadhi ya watu au vitabu vinavyosema kuwa anakamuliwa kwa nguvu, na hadi wengine wanamkunja maiti na kuminya tumbo lake na kulikamua kwa nguvu hasa. Hayo ni makosa. Lililo sahihi ni kumkamua kwa upole, ni kama unalipapasa tumbo lake na kulibonyeza kwa upole na utaratibu na kama kipo choo kitatoka na kama hakipo basi hakipo wala hakuna haja yoyote ya kumbana, kumminya, na kumpinda kama wengine wanavyofanya kutokana na mafundisho ya baadhi ya masheikh na vitabu.

Muislamu aliye hai anafaa kujisafisha na kuondoa uchafu kwa juhudi yake kubwa. Lakini pindi anapofariki huwa hawezi kujitwahirisha wala kujisafisha hivyo inafaa walio hai wamkirimu kwa kumsafisha na kumtayarisha kwa ajili ya mazishi. Katika kumsafisha ni kumtoa uchafu ulio ndani ya matumbo. Na inafaa tufahamu kuwa kukamuliwa huko kunafanywa kwa taratibu ili asiumizwe kwa njia yoyote ile.

Ama kuwekwa moto na kufukizwa si jambo lenye kupendeza wakati wowote ule, lakini kwa kama kuna harufu au kunachelewa hilo, basi kunaweza kuchomwa udi au kupulizwa vinukiavyo ili kuondoa harufu mbaya iliyo katika chumba anachooshewa maiti. Na bora zitumiwe njia nyingine za kutia harufu nzuri kuliko moto na hususan maiti mwenyewe aliacha wasia wa kukataza kufanyiwa hilo. Na wasia wa marehemu unapaswa kuheshimiwa na kutekelezwa kabisa maadam utakuwa haupingani na mafundisho ya Uislam.

Kwa faida zaidi ya mas-ala ya maiti, ingia kwenye viungo vifuatavyo:

Yampasayo Maiti

www.baawazir.com

Dalili Za Kheri Katika Mambo Yamfaayo Maiti

Na Allaah Anajua zaidi