Kusema 'Karrama Allaahu Wajhahuu' Kwa 'Aliy (Radhiya Allaahu 'anhu) Inafaa?

Kusema 'Karrama Allaahu Wajhahuu' Kwa 'Aliy (Radhiya Allaahu 'anhu) Inafaa?

 

 

 

SWALI:

 

Assalam alaykum! Nalileta suali langu nikitaka usaidizi wenu! Niliwahi kuongea na mtu kuhusu mas-ala ya bid-a akaniambia hata hilo neno la karramallahu wajhahu analokusudiwa Sayyidna Ali radhiyallahu anhu ni bid-a akisema kua halikua wakati wa mtume alayhi swalatu wassalam wala katika wakati wa makhalifa wane. Jee, hili ni neno la kweli ama mwaeweza kunielimisha vipi kuhusu hili neno? Shukran!

 

 

 

 

 

JIBU:

 

AlhamduliLLaah Himidi Anastahiki Allaah (Subhaanahu wa Ta’aala) Rabb wa walimwengu, Swalaah na salamu zimshukie Nabiy Muhammad (Swalla Allaahu 'alayhi wa aalihi wa sallam) na Swahaba zake (Radhwiya Allaahu 'anhum) na waliowafuata kwa wema mpaka Siku ya Mwisho.

 

Hakika ni kuwa Allaah (Subhaanahu wa Ta’ala) katika Qur-aan Tukufu tayari Ashatueleza fadhila na ubora wa Maswahaba (Radhwiya Allaahu ‘anhum) kwa jinsi ambayo hatutakuwa na njia ya kuzua sifa nyingine kwa Maswahaba wengine.

 

Sifa hiyo ya Maswahaba wote imetolewa katika Aayah ifuatayo:

Na wale waliotangulia, wa kwanza, katika Muhaajirina na Answaari, na walio wafuata kwa wema, Allaah Ameridhika nao, na wao wameridhika naye; na Amewaandalia Bustani zipitazo mito kati yake, wadumu humo milele. Huko ndiko kufuzu kukubwa” [At-Tawbah 9: 100].

Allaah (Subhaanahu wa Ta’ala) katika Aayah hii Amewakusanya wote kwa kusema: “Radhwiya Allaahu ‘anhum”.

 

Kwa hivyo, sifa hii ya Karrama Allaahu wajhahuu haipo katika Qur-aan, wala hakupatiwa na Mtume wa Allaah (Swalla Allaahu ‘alayhi wa aalihi wa sallam), wala kupatiwa na Maswahaba (Radhiya Allaahu ‘anhum) wenyewe. Hii ni sifa aliyopatiwa baadaye kutaka kuonyesha kuwa yeye alikuwa juu ya Maswahaba (Radhwiya Allaahu ‘anhum) wengine wote. Na ikiwa wanaomuita hivyo, wanasema kuwa anastahiki sifa hiyo kwa kuwa uso wake haukusujudia sanamu basi wapo pia Maswahaba (Radhwiya Allaahu ‘anhum) wengine wengi ambao hawakusujudia sanamu kwa hivyo nao wangepatiwa sifa kama hiyo lakini hawakupatiwa.

 

Kwa hiyo, turidhike na sifa Aliyowasifia Allaah (Subhaanahu wa Ta’ala) Maswahaba (Radhiya Allaahu ‘anhum), na tuache sifa nyingine za bid’ah ambazo mara nyingi utakuta zikitumiwa na watu wa bid’ah na wale wanaomtukuza sana ‘Aliy (Radhwiya Allaahu ‘anhu) kuliko Maswahaba wengine nao ni Mashia.

 

Imaam Ibn Kathiyr (Rahimahu Allaah) anasema katika Tafsiyr yake: “Nasema: Ni jambo lililoonea katika wenye vitabu vingi ambao wanaandika (‘Alayhis Salaam) baada ya jina la ‘Aliy (Radhiya Allaahu ‘anhu) pekee na si kwa Maswahaba wengine, au utakuta wanaandika Karrama Allaahu wajhahu. Pamoja na kuwa maana yake inakubalika, Maswahaba wote walikuwa wanapaswa kupewa heshima kama hiyo. Mashaykh wawili (Abu Bakr na ‘Umar) na Amiyrul Muuminiyn ‘Uthmaan walikuwa wanastahiki zaidi kuitwa hivyo, (Radhwiya Allaahu ‘anhum) Allaah Awaridhie wote.” Tafsiyr Ibn Kathiyr, Mj. 3/517-518.

 

 

Na Allaah Anajua zaidi

 

 

Share