Al-Qaadir: Muweza; Ambaye Ana uwezo kamili juu ya kila kitu, hakuna kinachomshinda wala kumshindisha.
Jina hili tukufu limetajwa katika Qur-aan mara saba kwa umoja, na mara tano kwa wingi (Qaadiruwn). Anasema Allaah (سبحانه وتعالى):
قُلْ هُوَ الْقَادِرُ عَلَىٰ أَن يَبْعَثَ عَلَيْكُمْ عَذَابًا مِّن فَوْقِكُمْ أَوْ مِن تَحْتِ أَرْجُلِكُمْ أَوْ يَلْبِسَكُمْ شِيَعًا وَيُذِيقَ بَعْضَكُم بَأْسَ بَعْضٍ ۗ انظُرْ كَيْفَ نُصَرِّفُ الْآيَاتِ لَعَلَّهُمْ يَفْقَهُونَ ﴿٦٥﴾
Sema: Yeye Ni Muweza wa kukuleteeni adhabu kutoka juu yenu, au kutoka chini ya miguu yenu, au Akutatanisheni mfarikiane kuwa makundi na Akuonjesheni baadhi yenu (vurugu la) nguvu za wengineo. Tazama jinsi Tunavyosarifu Aayaat (Ishara, Hoja, Dalili) namna kwa namna wapate kufahamu. [Al-An’aam (6:65)]
Na Anasema pia:
أَوَلَيْسَ الَّذِي خَلَقَ السَّمَاوَاتِ وَالْأَرْضَ بِقَادِرٍ عَلَىٰ أَن يَخْلُقَ مِثْلَهُم ۚ بَلَىٰ وَهُوَ الْخَلَّاقُ الْعَلِيمُ ﴿٨١﴾
Je, kwani Yule Aliyeumba mbingu na ardhi (mnadhani) Hana uwezo wa kuumba mfano wao? Sivyo hivyo (Anaweza bila shaka)! Naye Ni Mwingi wa Kuumba Atakavyo, Mjuzi wa yote. [Yaasiyn (36:81)]
Maana Ya Al-Qaadir:
1-Allaah (سبحانه وتعالى) Ana uwezo kamili usio na kikomo wala upungufu; Analotaka huwa, na Asilolitaka haliwi.
2-Uwezo Wake unadhihirika katika uumbaji: Aliyeumba mbingu na ardhi Anaweza zaidi kuumba mfano wa wanaadam (rejea Yaasiyn (36:81) juu). Anasema Allaah (سبحانه وتعالى):
أَوَلَمْ يَرَوْا أَنَّ اللَّـهَ الَّذِي خَلَقَ السَّمَاوَاتِ وَالْأَرْضَ قَادِرٌ عَلَىٰ أَن يَخْلُقَ مِثْلَهُمْ وَجَعَلَ لَهُمْ أَجَلًا لَّا رَيْبَ فِيهِ فَأَبَى الظَّالِمُونَ إِلَّا كُفُورًا ﴿٩٩﴾
Je, hawajaona kwamba Allaah Ambaye Ameumba mbingu na ardhi Ni Muweza wa Kuumba mfano wao? Na Amewawekea muda maalumu usio na shaka? Lakini madhalimu wamekataa kabisa hawana isipokuwa kukufuru tu. [Al-Israa (17:99)]
3-Uwezo Wake unadhihirika katika kufufua wafu. Anasema Allaah (سبحانه وتعالى):
أَلَيْسَ ذَٰلِكَ بِقَادِرٍ عَلَىٰ أَن يُحْيِيَ الْمَوْتَىٰ﴿٤٠﴾
Je, Huyo (Allaah Anayeumba) Si Muweza wa Kuhuisha wafu?! [Al-Qiyaamah (75:40)]
Na Anasema pia:
إِنَّهُ عَلَىٰ رَجْعِهِ لَقَادِرٌ ﴿٨﴾
Hakika Yeye (Allaah) bila shaka Ni Muweza wa Kumrudisha (hai). [At-Twaariq (86:8)]
4-Na Uwezo Wake unafika hata katika mambo madogo na yenye undani kabisa, kama kusawazisha ncha za vidole. Anasema Allaah (سبحانه وتعالى):
أَيَحْسَبُ الْإِنسَانُ أَلَّن نَّجْمَعَ عِظَامَهُ﴿٣﴾ بَلَىٰ قَادِرِينَ عَلَىٰ أَن نُّسَوِّيَ بَنَانَهُ﴿٤﴾
Je, anadhani binaadam kwamba Hatutoikusanya mifupa yake? Sivyo hivyo! Bali Tuna Uwezo wa kusawazisha sawasawa ncha za vidole vyake. [Al-Qiyaamah (75:3-4)]
Taathira Ya Imaan, Faida, Mafunzo Tuyapatayo Na Jinsi Ya Kufanyia Kazi Jina Hili La Allaah, Al-Qaadir:
1-Amini Kufufuliwa, Kwani Al-Qaadir Anaweza Kuhuisha Wafu:
Kumbuka, ee Mja wa Al-Qaadir, kwamba Aliyekuumba mara ya kwanza Anaweza kukurudisha, na hilo ni jepesi Kwake (rejea Al-Qiyaamah (75:40) juu); basi jiandae kwa Siku hiyo.
2-Tahadhari Na Kujiona Uko Salama Na Adhabu Ya Al-Qaadir:
Tahadhari na kuendelea na maasi ukidhani uko salama; kwani Al-Qaadir Anaweza kukuletea adhabu kutoka juu yako au kutoka chini ya miguu yako (rejea Al-An’aam (6:65) juu).
3-Kuwa Na Yakini Kwamba Al-Qaadir Atatimiza Ahadi Zake:
Tambua kwamba Al-Qaadir Ni Muweza wa kutimiza kila Alichoahidi, iwe ni nusura kwa Waumini au adhabu kwa wakanushaji. Anasema Allaah (سبحانه وتعالى):
وَإِنَّا عَلَىٰ أَن نُّرِيَكَ مَا نَعِدُهُمْ لَقَادِرُونَ ﴿٩٥﴾
Na hakika Sisi Kukuonyesha yale Tunayowaahidi (ya adhabu) Tunaweza bila shaka yoyote. [Al-Muuminuwn (23:95)]
4-Usijione Wa Lazima, Kwani Al-Qaadir Anaweza Kuleta Wengine Badala Yako:
Kumbuka kwamba Al-Qaadir Hakuhitaji; Anaweza kuwabadilisha watu kwa walio bora kuliko wao. Anasema Allaah (سبحانه وتعالى):
فَلَا أُقْسِمُ بِرَبِّ الْمَشَارِقِ وَالْمَغَارِبِ إِنَّا لَقَادِرُونَ﴿٤٠﴾ عَلَىٰ أَن نُّبَدِّلَ خَيْرًا مِّنْهُمْ وَمَا نَحْنُ بِمَسْبُوقِينَ﴿٤١﴾
Basi Naapa kwa Rabb wa Mashariki na Magharibi, hakika Sisi bila shaka Ni Wenye uwezo. Wa kwamba Tuwabadili walio bora kuliko wao, Nasi Hatushindwi. [Al-Ma’aarij (70:40-41)]
5-Tafakari Uwezo Wa Al-Qaadir Katika Undani Wa Uumbaji Wako:
Tafakari, ee Mja wa Al-Qaadir, alama za vidole vyako zisizofanana na za mtu mwingine yeyote; na Allaah Ameapa kwamba Anaweza kuzisawazisha hata baada ya kuoza (rejea Al-Qiyaamah (75:3-4) juu).
6-Ondoa Uwezo Wako Na Nguvu Zako, Utegemee Uwezo Wa Al-Qaadir:
Tambua kwamba hakuna uwezo wala nguvu isipokuwa kwa Al-Qaadir; na kuikiri hivyo ni hazina miongoni mwa hazina za Jannah. Rasuli wa Allaah (صلى الله عليه وآله وسلم) amesema:
عَنْ أَبِي مُوسَى الأَشْعَرِيِّ (رضي الله عنه) قَالَ: قَالَ لِي رَسُولُ اللَّهِ (صلى الله عليه وسلم): ((أَلاَ أَدُلُّكَ عَلَى كَنْزٍ مِنْ كُنُوزِ الْجَنَّةِ؟)) فَقُلْتُ: بَلَى يَا رَسُولَ اللَّهِ. قَالَ: ((قُلْ: لاَ حَوْلَ وَلاَ قُوَّةَ إِلاَّ بِاللَّهِ))
Amesimulia Abuu Muwsaa Al-Ash’ariyy (رضي الله عنه): Rasuli wa Allaah (صلى الله عليه وآله وسلم) aliniambia: “Je, nikujulishe hazina miongoni mwa hazina za Jannah?” Nikasema: Ndiyo, yaa Rasula-Allaah. Akasema: “Sema:
لاَ حَوْلَ وَلاَ قُوَّةَ إِلاَّ بِاللَّهِ
Hapana uwezo wala nguvu isipokuwa kwa Allaah.” [Al-Bukhaariy] [Muslim]
7-Usikate Tamaa Katika Jambo Lolote, Kwani Hakuna Kinachomshinda Al-Qaadir:
Kumbuka, ee Mja wa Al-Qaadir, kwamba Aliyemfufua mfu Anaweza kukutoa katika dhiki yoyote; basi usikate tamaa, na mwombe Yeye. Anasema Allaah (سبحانه وتعالى):
أَوَلَمْ يَسِيرُوا فِي الْأَرْضِ فَيَنظُرُوا كَيْفَ كَانَ عَاقِبَةُ الَّذِينَ مِن قَبْلِهِمْ وَكَانُوا أَشَدَّ مِنْهُمْ قُوَّةً ۚ وَمَا كَانَ اللَّـهُ لِيُعْجِزَهُ مِن شَيْءٍ فِي السَّمَاوَاتِ وَلَا فِي الْأَرْضِ ۚ إِنَّهُ كَانَ عَلِيمًا قَدِيرًا ﴿٤٤﴾
Je, hawakutembea katika ardhi, wakatazama vipi ilikuwa hatima ya wale walio kabla yao, nao walikuwa wenye nguvu zaidi kuliko wao? Na hakuna lolote limshindalo Allaah mbinguni wala ardhini. Hakika Yeye daima Ni Mjuzi wa yote, Mweza wa yote. [Faatwir (35:44)]
8-Tumia Uwezo Uliopewa Katika Kumtii Al-Qaadir:
Tambua kwamba kila uwezo ulio nao ni amana kutoka Kwake; basi usiutumie katika kuwadhulumu wanyonge, kwani Al-Qaadir Yuko juu yako.
9-Mtake Ushauri Al-Qaadir Katika Mambo Yako Kwa Istikhaarah:
Kumbuka, ee Mja wa Al-Qaadir, kwamba katika du’aa ya Istikhaarah unasema: “وَأَسْتَقْدِرُكَ بِقُدْرَتِكَ … فَإِنَّكَ تَقْدِرُ وَلاَ أَقْدِرُ” (na nakuomba uwezo kwa Uwezo Wako … kwani Wewe Unaweza nami siwezi). Rejea du’aa kamili katika 056-Al-Khabiyr [Al-Bukhaariy].
10-Jikinge Kwa Uwezo Wa Al-Qaadir Unapohisi Maumivu:
Omba du’aa, ee Mja wa Al-Qaadir, ukiweka mkono wako mahali panapouma, na useme mara saba: “أَعُوذُ بِاللَّهِ وَقُدْرَتِهِ مِنْ شَرِّ مَا أَجِدُ وَأُحَاذِرُ” (Najikinga kwa Allaah na kwa Uwezo Wake kutokana na shari ya ninachokihisi na ninachokiogopa). Rejea Hadiyth kamili katika 022-Al-‘Aziyz [Muslim].
Na Allaah Mjuzi zaidi