Al-Qaahir: Mwenye kudhibiti na kushinda; Aliyedhibiti vyote chini ya Mamlaka Yake, Aliye juu ya Waja Wake, hakuna kinachoweza kumpinga.
Jina hili tukufu limetajwa katika Qur-aan mara mbili (2), zote katika Suwrah Al-An’aam. Anasema Allaah (سبحانه وتعالى):
وَهُوَ الْقَاهِرُ فَوْقَ عِبَادِهِ ۚ وَهُوَ الْحَكِيمُ الْخَبِيرُ ﴿١٨﴾
Naye Ndiye Aliyedhibiti vyote chini ya Mamlaka Yake, Aliye juu ya Waja Wake. Naye Ndiye Mwenye Hikmah wa yote, Mjuzi wa Khabari za dhahiri na siri. [Al-An’aam (6:18)]
Na Anasema pia:
وَهُوَ الْقَاهِرُ فَوْقَ عِبَادِهِ ۖ وَيُرْسِلُ عَلَيْكُمْ حَفَظَةً حَتَّىٰ إِذَا جَاءَ أَحَدَكُمُ الْمَوْتُ تَوَفَّتْهُ رُسُلُنَا وَهُمْ لَا يُفَرِّطُونَ ﴿٦١﴾
Naye Ndiye Aliyedhibiti vyote chini ya Mamlaka Yake, Aliye juu ya Waja Wake. Na Anakutumieni Malaika wachungaji wadhibiti, hata yanapomfikia mmoja wenu mauti, Wajumbe Wetu humfisha, nao hawafanyi taksiri. [Al-An’aam (6:61)]
Maana Ya Al-Qaahir:
1-Allaah (سبحانه وتعالى) Amedhibiti viumbe vyote; hakuna kinachotoka nje ya Mamlaka Yake, na kila kitu kinamnyenyekea kwa hiari au kwa lazima.
2-Yeye Yuko juu ya Waja Wake (فَوْقَ عِبَادِهِ) kwa Dhati Yake, kwa ushindi Wake na kwa Utukufu Wake; Yuko juu ya ‘Arsh Yake, na Ujuzi Wake Umeenea kila mahali na kila kitu.
3-Na katika udhibiti Wake ni kwamba hakuna wa kuondoa dhara Aliyoileta, wala wa kuzuia kheri Aliyoitaka. Anasema Allaah (سبحانه وتعالى):
وَإِن يَمْسَسْكَ اللَّـهُ بِضُرٍّ فَلَا كَاشِفَ لَهُ إِلَّا هُوَ ۖ وَإِن يَمْسَسْكَ بِخَيْرٍ فَهُوَ عَلَىٰ كُلِّ شَيْءٍ قَدِيرٌ ﴿١٧﴾
Na Allaah Akikugusisha kwa dhara, basi hakuna yeyote wa kuiondoa isipokuwa Yeye, na Akikugusisha kheri, basi Yeye juu ya kila kitu Ni Muweza. [Al-An’aam (6:17)]
Taathira Ya Imaan, Faida, Mafunzo Tuyapatayo Na Jinsi Ya Kufanyia Kazi Jina Hili La Allaah, Al-Qaahir:
1-Amini Kwamba Al-Qaahir Yuko Juu Ya Waja Wake:
Kumbuka, ee Mja wa Al-Qaahir, kwamba Aayah zote mbili zimesema: “Naye Ndiye Al-Qaahir juu ya Waja Wake” (rejea Al-An’aam (6:18) na (6:61) juu); nayo ni dalili ya ‘Uluwa wa Allaah juu ya viumbe Vyake.
2-Kumbuka Kwamba Mauti Ni Udhibiti Wa Al-Qaahir Juu Ya Kila Nafsi:
Tambua kwamba hakuna mfalme wala tajiri anayeweza kuyazuia mauti; wajumbe wa Al-Qaahir wanamfisha kila mmoja kwa wakati wake (rejea Al-An’aam (6:61) juu). Anasema Allaah (سبحانه وتعالى):
كُلُّ نَفْسٍ ذَائِقَةُ الْمَوْتِ ۗ وَإِنَّمَا تُوَفَّوْنَ أُجُورَكُمْ يَوْمَ الْقِيَامَةِ ۖ فَمَن زُحْزِحَ عَنِ النَّارِ وَأُدْخِلَ الْجَنَّةَ فَقَدْ فَازَ ۗ وَمَا الْحَيَاةُ الدُّنْيَا إِلَّا مَتَاعُ الْغُرُورِ ﴿١٨٥﴾
Kila nafsi itaonja mauti. Na hakika mtalipwa kikamilifu ujira wenu Siku ya Qiyaamah. Basi atakayewekwa mbali na moto na akaingizwa Jannah, huyo kwa yakini amefuzu. Na uhai wa dunia si lolote ila ni starehe ya udanganyifu. [Aal-‘Imraan (3:185)]
3-Mkimbilie Al-Qaahir Pekee Unapofikwa Na Dhara:
Kumbuka, ee Mja wa Al-Qaahir, kwamba hakuna wa kuondoa dhara isipokuwa Yeye (rejea Al-An’aam (6:17) juu); basi mwombe Yeye kwanza kabla ya kukimbilia viumbe.
4-Tambua Kwamba Walinzi Wako Ni Malaika Aliowatuma Al-Qaahir:
Tambua kwamba Al-Qaahir Anatuma Malaika wachungaji wanaokuhifadhi na kuandika amali zako mpaka wakati wa mauti (rejea Al-An’aam (6:61) juu).
5-Usidanganyike Na Nguvu Za Majabari, Kwani Al-Qaahir Yuko Juu Yao:
Tahadhari, ee Mja wa Al-Qaahir, na kudanganyika na madai ya majabari; Fir’awn alidai kuwa yuko juu ya Bani Israaiyl akiwadhibiti, lakini Allaah Alimzamisha. Anasema Allaah (سبحانه وتعالى):
وَقَالَ الْمَلَأُ مِن قَوْمِ فِرْعَوْنَ أَتَذَرُ مُوسَىٰ وَقَوْمَهُ لِيُفْسِدُوا فِي الْأَرْضِ وَيَذَرَكَ وَآلِهَتَكَ ۚ قَالَ سَنُقَتِّلُ أَبْنَاءَهُمْ وَنَسْتَحْيِي نِسَاءَهُمْ وَإِنَّا فَوْقَهُمْ قَاهِرُونَ ﴿١٢٧﴾
Na wakasema wakuu katika kaumu ya Firawni: Je, unamwacha Muwsaa na kaumu yake wafisidi katika ardhi, na akuache wewe na waabudiwa wako? (Firawni) akasema: Tutawaua watoto wao wa kiume na tutaacha hai wanawake wao, na hakika sisi ni wenye kushinda nguvu juu yao. [Al-A’raaf (7:127)]
6-Nyenyekea Kwa Hiari Kabla Hujanyenyekezwa Kwa Lazima:
Kumbuka kwamba viumbe vyote vinamnyenyekea Al-Qaahir, kwa hiari au kwa lazima; basi uwe miongoni mwa wanaonyenyekea kwa hiari. Anasema Allaah (سبحانه وتعالى):
أَفَغَيْرَ دِينِ اللَّـهِ يَبْغُونَ وَلَهُ أَسْلَمَ مَن فِي السَّمَاوَاتِ وَالْأَرْضِ طَوْعًا وَكَرْهًا وَإِلَيْهِ يُرْجَعُونَ ﴿٨٣﴾
Je, wanataka dini isiyokuwa ya Allaah, na hali amejisalimisha Kwake kila aliye katika mbingu na katika ardhi akipenda asipende na Kwake watarejeshwa? [Aal-‘Imraan (3:83)]
7-Dhibiti Nafsi Yako Na Matamanio Yake:
Tambua, ee Mja wa Al-Qaahir, kwamba anayemkhofu Rabb wake na kuizuia nafsi yake na matamanio, makazi yake ni Jannah. Anasema Allaah (سبحانه وتعالى):
وَأَمَّا مَنْ خَافَ مَقَامَ رَبِّهِ وَنَهَى النَّفْسَ عَنِ الْهَوَىٰ ﴿٤٠﴾ فَإِنَّ الْجَنَّةَ هِيَ الْمَأْوَىٰ ﴿٤١﴾
Ama yule aliyekhofu kisimamo mbele ya Rabb wake, na akaikataza nafsi yake na hawaa. Basi hakika Jannah ndio makaazi yake. [An-Naazi’aat (79:40-41)]
8-Ridhika Na Qadar Ya Al-Qaahir Katika Mambo Yasiyo Katika Uwezo Wako:
Kumbuka, ee Mja wa Al-Qaahir, kwamba yaliyo nje ya uwezo wako yako chini ya udhibiti Wake na Hikmah Yake; basi ridhika na utulie. Anasema Allaah (سبحانه وتعالى):
قُل لَّن يُصِيبَنَا إِلَّا مَا كَتَبَ اللَّـهُ لَنَا هُوَ مَوْلَانَا ۚ وَعَلَى اللَّـهِ فَلْيَتَوَكَّلِ الْمُؤْمِنُونَ﴿٥١﴾
Sema: Halitusibu (lolote) isipokuwa lile Alilotukidhia Allaah. Yeye Ni Mawlaa wetu. Basi kwa Allaah watawakali Waumini. [At-Tawbah (9:51)]
9-Usimdhulumu Mnyonge, Kwani Al-Qaahir Anamtetea:
Tambua kwamba uwezo wako juu ya mnyonge si kitu mbele ya Uwezo wa Al-Qaahir juu yako; basi usimdhulumu yatima wala masikini. Anasema Allaah (سبحانه وتعالى):
فَأَمَّا الْيَتِيمَ فَلَا تَقْهَرْ ﴿٩﴾ وَأَمَّا السَّائِلَ فَلَا تَنْهَرْ ﴿١٠﴾
Kwa hivyo basi yatima usimuonee. Na ama mwombaji, basi usimkaripie. [Adhw-Dhwuhaa (93:9-10)]
10-Jikinge Kwa Al-Qaahir Na Kushindwa Na Watu:
Omba du’aa, ee Mja wa Al-Qaahir, kama alivyokuwa akiomba Nabiy (صلى الله عليه وآله وسلم):
عَنْ أَنَسِ بْنِ مَالِكٍ (رضي الله عنه) قَالَ: كَانَ النَّبِيُّ (صلى الله عليه وسلم) يَقُولُ: ((اللَّهُمَّ إِنِّي أَعُوذُ بِكَ مِنَ الْهَمِّ وَالْحَزَنِ، وَالْعَجْزِ وَالْكَسَلِ، وَالْبُخْلِ وَالْجُبْنِ، وَضَلَعِ الدَّيْنِ، وَغَلَبَةِ الرِّجَالِ))
Amesimulia Anas bin Maalik (رضي الله عنه): Nabiy (صلى الله عليه وآله وسلم) alikuwa akisema:
اللَّهُمَّ إِنِّي أَعُوذُ بِكَ مِنَ الْهَمِّ وَالْحَزَنِ، وَالْعَجْزِ وَالْكَسَلِ، وَالْبُخْلِ وَالْجُبْنِ، وَضَلَعِ الدَّيْنِ، وَغَلَبَةِ الرِّجَالِ
Yaa Allaah! Hakika mimi najikinga Kwako kutokana na hamu na huzuni, kushindwa na uvivu, ubakhili na woga, uzito wa deni, na kushindwa na watu. [Al-Bukhaariy]
Na Allaah Mjuzi zaidi