Al-Kaafiy: Mwenye kutosheleza; Anayewatosheleza Waja Wake katika kila wanachokihitaji, na Anayewalinda na shari ya maadui zao.
Jina hili tukufu limekuja katika Qur-aan kwa namna ya swali la kuthibitisha. Anasema Allaah (سبحانه وتعالى):
أَلَيْسَ اللَّـهُ بِكَافٍ عَبْدَهُ ۖ وَيُخَوِّفُونَكَ بِالَّذِينَ مِن دُونِهِ ۚ وَمَن يُضْلِلِ اللَّـهُ فَمَا لَهُ مِنْ هَادٍ﴿٣٦﴾
Je, kwani Allaah Si Mwenye Kumtosheleza Mja Wake? Na eti wanakutisha na wale wasiokuwa Yeye. Na ambaye Allaah Amempotoa basi hana wa kumhidi. [Az-Zumar (39:36)]
Na Allaah Alimwahidi Nabiy Wake (صلى الله عليه وآله وسلم) kumtosheleza dhidi ya maadui:
فَإِنْ آمَنُوا بِمِثْلِ مَا آمَنتُم بِهِ فَقَدِ اهْتَدَوا ۖ وَّإِن تَوَلَّوْا فَإِنَّمَا هُمْ فِي شِقَاقٍ ۖ فَسَيَكْفِيكَهُمُ اللَّـهُ ۚ وَهُوَ السَّمِيعُ الْعَلِيمُ ﴿١٣٧﴾
Watakapoamini kama vile mlivyoamini nyinyi, basi kwa yakini watakuwa wameongoka. Na wakikengeuka, basi hakika wao wamo katika upinzani, na Allaah Atakutosheleza nao, Naye Ni Mwenye Kusikia yote, Mjuzi wa yote. [Al-Baqarah (2:137)]
Maana Ya Al-Kaafiy:
1-Allaah (سبحانه وتعالى) Anawatosheleza viumbe vyote katika mahitaji yao ya rizki na maisha.
2-Na Anawatosheleza Waumini kwa namna maalumu: Anawalinda, Anawasaidia, na Anawaepusha na shari ya maadui. Anasema Allaah (سبحانه وتعالى):
إِنَّا كَفَيْنَاكَ الْمُسْتَهْزِئِينَ﴿٩٥﴾
Hakika Sisi Tunakutosheleza dhidi ya wafanyao istihzai. [Al-Hijr (15:95)]
3-Anayetawakali Kwake, Yeye Anamtosha. Anasema Allaah (سبحانه وتعالى):
وَيَرْزُقْهُ مِنْ حَيْثُ لَا يَحْتَسِبُ ۚ وَمَن يَتَوَكَّلْ عَلَى اللَّـهِ فَهُوَ حَسْبُهُ ۚ إِنَّ اللَّـهَ بَالِغُ أَمْرِهِ ۚ قَدْ جَعَلَ اللَّـهُ لِكُلِّ شَيْءٍ قَدْرًا﴿٣﴾
Na Atamruzuku kutoka njia ambayo hatazamii. Na yeyote anayetawakali kwa Allaah, basi Yeye Humtosheleza. Hakika Allaah Anatimiza Kusudio Lake. Allaah Amejaalia makadirio kwa kila kitu. [Atw-Twalaaq (65:3)]
Taathira Ya Imaan, Faida, Mafunzo Tuyapatayo Na Jinsi Ya Kufanyia Kazi Jina Hili La Allaah, Al-Kaafiy:
1-Tosheka Na Al-Kaafiy, Wala Usiwaogope Wanaokutisha:
Kumbuka kwamba Al-Kaafiy Anamtosha Mja Wake, hata wakimtisha kwa wengine (rejea Az-Zumar (39:36) juu).
2-Mtegemee Al-Kaafiy Katika Kila Jambo:
Tambua, ee Mja wa Al-Kaafiy, kwamba anayemtegemea Allaah kwa ukweli, Allaah Humtosha (rejea Atw-Twalaaq (65:3) juu). Anasema Allaah (سبحانه وتعالى):
وَتَوَكَّلْ عَلَى اللَّـهِ ۚ وَكَفَىٰ بِاللَّـهِ وَكِيلًا ﴿٣﴾
Na tawakali kwa Allaah. Na Anatosheleza Allaah Kuwa Ni Mtegemewa. [Al-Ahzaab (33:3)]
3-Usiwaogope Wanaokudhihaki Kwa Ajili Ya Dini:
Kumbuka kwamba Al-Kaafiy Alimtosheleza Nabiy Wake (صلى الله عليه وآله وسلم) dhidi ya wanaomdhihaki (rejea Al-Hijr (15:95) juu); basi shikamana na haki bila kuogopa dhihaka.
4-Soma Aayah Mbili Za Mwisho Za Al-Baqarah Usiku, Zitakutosheleza:
Tambua, ee Mja wa Al-Kaafiy, kwamba Nabiy (صلى الله عليه وآله وسلم) amesema:
عَنْ أَبِي مَسْعُودٍ (رضي الله عنه) قَالَ: قَالَ النَّبِيُّ (صلى الله عليه وسلم): ((مَنْ قَرَأَ بِالآيَتَيْنِ مِنْ آخِرِ سُورَةِ الْبَقَرَةِ فِي لَيْلَةٍ كَفَتَاهُ))
Amesimulia Abuu Mas’uwd (رضي الله عنه): Nabiy (صلى الله عليه وآله وسلم) amesema: “Atakayesoma Aayah mbili za mwisho za Suwrah Al-Baqarah usiku, zitamtosheleza.” [Al-Bukhaariy] [Muslim]
5-Mshukuru Al-Kaafiy Kila Unapokwenda Kulala:
Kumbuka kwamba watu wengi hawana wa kuwatosheleza wala wa kuwapa hifadhi; basi mshukuru Al-Kaafiy kama alivyokuwa akifanya Nabiy (صلى الله عليه وآله وسلم):
عَنْ أَنَسٍ (رضي الله عنه) أَنَّ رَسُولَ اللَّهِ (صلى الله عليه وسلم) كَانَ إِذَا أَوَى إِلَى فِرَاشِهِ قَالَ: ((الْحَمْدُ لِلَّهِ الَّذِي أَطْعَمَنَا وَسَقَانَا، وَكَفَانَا وَآوَانَا، فَكَمْ مِمَّنْ لاَ كَافِيَ لَهُ وَلاَ مُؤْوِيَ))
Amesimulia Anas (رضي الله عنه) kwamba Rasuli wa Allaah (صلى الله عليه وآله وسلم) alikuwa anapokwenda kulala husema:
الْحَمْدُ لِلَّهِ الَّذِي أَطْعَمَنَا وَسَقَانَا، وَكَفَانَا وَآوَانَا، فَكَمْ مِمَّنْ لاَ كَافِيَ لَهُ وَلاَ مُؤْوِيَ
Himdi Anastahiki Allaah Ambaye Ametulisha na Ametunywesha, na Ametutosheleza na Ametupa makazi; kwani wangapi wasio na wa kuwatosheleza wala wa kuwapa makazi! [Muslim]
6-Tosheka Na Kidogo Ulichoruzukiwa:
Tambua, ee Mja wa Al-Kaafiy, kwamba kutosheka ni utajiri wa kweli; na Nabiy (صلى الله عليه وآله وسلم) amesema kwamba utajiri si wingi wa mali bali ni utajiri wa nafsi (rejea 052-Al-Ghaniyy) [Al-Bukhaariy] [Muslim].
7-Usiwaombe Watu Mambo Aliyoyakutosheleza Al-Kaafiy:
Kumbuka kwamba anayemwomba Allaah Humtosha, na anayewaomba watu huwa dhalili kwao; basi omba kwa Al-Kaafiy kwanza (rejea wasiya wa Nabiy kwa Ibn ‘Abbaas katika 008-Asw-Swamad).
8-Kuwa Kinga Kwa Wenzako Kwa Kadiri Unavyoweza:
Tambua kwamba anayewatosheleza watu katika haja zao, Al-Kaafiy Humtosheleza katika haja zake (rejea Hadiyth “مَنْ نَفَّسَ عَنْ مُؤْمِنٍ كُرْبَةً…” katika 023-Al-Jabbaar) [Muslim].
9-Al-Kaafiy Anatosha Kuwa Muongozaji Na Mnusuru:
Kumbuka kwamba hata unapokabiliwa na maadui wa Dini, Al-Kaafiy Anatosha kuwa Muongozaji wako na Mnusuru wako. Anasema Allaah (سبحانه وتعالى):
وَكَذَٰلِكَ جَعَلْنَا لِكُلِّ نَبِيٍّ عَدُوًّا مِّنَ الْمُجْرِمِينَ ۗ وَكَفَىٰ بِرَبِّكَ هَادِيًا وَنَصِيرًا ﴿٣١﴾
Na hivyo ndivyo Tumemfanyia kila Nabiy adui miongoni mwa wahalifu. Na Rabb wako Anatosheleza kuwa ni Mwenye Kuongoza na Mwenye Kunusuru. [Al-Furqaan (25:31)]
10-Mwombe Al-Kaafiy Akutosheleze Shari Ya Kila Kitu:
Omba du’aa, ee Mja wa Al-Kaafiy, kwa kujikinga na shari zote, na sema asubuhi na jioni: “بِسْمِ اللَّهِ الَّذِي لاَ يَضُرُّ مَعَ اسْمِهِ شَيْءٌ فِي الأَرْضِ وَلاَ فِي السَّمَاءِ وَهُوَ السَّمِيعُ الْعَلِيمُ” mara tatu (rejea Hadiyth ya ‘Uthmaan (رضي الله عنه) katika 031-As-Samiy’).
Na Allaah Mjuzi zaidi