Swahiyh Fiqh As-Sunnah
كِتَابُ الفَرْق بَيْنَ الزَّوْجَيْنِ
Kitabu Cha Kutengana Mke Na Mume
الطَّلَاقُ السُّنِّيُّ والبِدعِيُّ
Talaka Ya Kisunnah Na Kibid'ah
03: Talaka Ya Kisunnah: Idadi Ya Talaka:
Kwanza: Kwa Mwenye Kupata Hedhi Aliyeingiliwa:
Talaka ya Kisunnah inapatikana kwa huyu kwa kumpa talaka moja tu akiwa katika hali ya utwahara bila mumewe kumuingilia, kisha amsubirie mpaka eda yake imalizike (twahara tatu), na wala asiandamize talaka nyingine kabla ya kumalizika eda yake. Na ikiwa ataandamiza, basi inakuwa ni talaka ya kibid'-ah kwa mujibu wa kauli ya Jumhuwr kinyume na Ash-Shaafi'iy na Ibn Hazm. Dalili kuhusiana na suala hili zimeelezwa kwenye suala la kutoa talaka tatu kwa mpigo.
Na kama atampa talaka moja kila baada ya kutwaharika na hedhi, hukmu yake itakuwa ni sawa na hukmu ya kumpa talaka tatu kwa mpigo akiwa katika hali ya utwahara. Hii ni kauli ya Ahmad, Maalik, Al-Awzaa'iy na Abu 'Ubayd.
Pili: Kwa Ambaye Hakuingiliwa:
Huyu anakuwa ni kama aliyeingiliwa. Ikiwa atamtaliki mkewe ambaye hakumuingilia talaka tatu, basi talaka zake zinakuwa ni kinyume na talaka ya Kisunnah.
Tatu: Kwa Ambaye Hapati Hedhi Kutokana Na Umri Mdogo Au Mkubwa:
Huyu eda yake inakuwa ni kwa miezi kama Alivyosema Allaah Ta'aalaa:
"وَاللَّائِي يَئِسْنَ مِنَ الْمَحِيضِ مِن نِّسَائِكُمْ إِنِ ارْتَبْتُمْ فَعِدَّتُهُنَّ ثَلَاثَةُ أَشْهُرٍ وَاللَّائِي لَمْ يَحِضْنَ"
“Na wale wanawake wanaokoma hedhi miongoni mwa wanawake wenu, mkiwa mna shaka, basi eda yao ni miezi mitatu, pamoja na wale wanawake wasiopata hedhi”. [At-Twalaaq: 04]