Sitta Shawwaal: Inafaa Kutia Niyyah Mbili Za Kulipa Deni La Ramadhwaan Na Sita Shawwaal?
Inafaa Kutia Niyyah Mbili Za Kulipa Deni La Ramadhwaan Na Sita Shawwaal?
SWALI:
As-salaam alaykum Warahmatullah Wabarakatuh
Naomba fatwa kwa masuala yangu yafuatayo:
Je inawezekeana kwa mwanamke aliyeingia kwenye siku zake (hedhi) katika mwezi wa ramadhani, baada ya ramadhani kumalizika, kufunga ( kulipa ) ramadhani na wakati huo huo (sambamba) kufunga sitatul shawwal? yaani kama piriadi yake ni siku 5 na sitatul shawwal siku 6, akafunga siku 6 kwa kutia nia mbili pamoja?
a) kama inawezekana atatia nia vipi?
b) kama haiwezekani, ni funga ipi aianze kwanza ? yaani siku alizozikosa ramadhani au anaweza kuanza na sitatul shawwal, badae ndio akalipa ramadhani
JIBU:
AlhamduliLLaah - Himidi Anastahiki Allaah (Subhaanahu wa Ta’aala) Rabb wa walimwengu, Swalaah na salamu zimshukie Nabiy Muhammad (Swalla Allaahu 'alayhi wa aalihi wa sallam) na Swahaba zake (Radhwiya Allaahu 'anhum) na waliowafuata kwa wema mpaka Siku ya Mwisho.
Haiwezekani kufunga deni na Sita Shawwaal kwa niyyah moja. Rai iliyosahihi ni kwamba, kufunga Sita Shawwaal kunawezekana tu baada ya kumaliza deni kwanza la Ramadhwaan. Hii ni kutokana na Hadiyth ya Nabiy (Swalla Allaahu 'alayhi wa aalihi wa sallam)
((من صام رمضان ثم أتبعه بست من شوال))
Atakayefunga Ramadhwaan, kisha akafuatia na Sita za Shawwal…
[Muslim, Abu Daawuwd, Tirmidhiy, Ibn Maajah, Ahmad, Ad-Daarimiy].
Kiunganisho cha neno 'kisha' katika Hadiyth hii ni dalili kuwa kufunga huko lazima kutimizwe kwa mpango, yaani kwanza kukamilisha funga ya Ramadhwaan pamoja na deni lake kama mtu analo, kisha ndio kufunga Sita Shawwaal ili kupata hizo fadhila zilizotajwa katika Hadiyth. Aliyefunga Ramadhwaan bila ya kuikamilisha hatambuliki kuwa ni yule aliyefunga Ramadhwaan kamili.
Kwa hiyo kutia niyyah moja katika funga hii ya Sita Shawwaal haiwezekani, bali ikiwa atafunga mtu deni lake katika siku za kufunga Sunnah yoyote kama Jumatatu na Alkhamiys, au siku za Ayaamul-Biydhw (tarehe 13, 14, 15), au siku ya 'Ashuraa au 'Arafah ndio inawezekana kutia niyyah pamoja na Swawm hizo na huweza kupata thawabu za fadhila zote.
Tafadhali bonyeza viungo vifuatavyo upate maelezo zaidi:
- Fataawa Mbali Mbali Kuhusu Kulipa Deni Na Kufunga Sita Shawwaal
- Hukmu Ya Kufunga Ijumaa Ikiwa Ni Siku Ya 'Arafah Au 'Ashuraa
- Hukumu Ya Kufunga Siku Ya Jumamosi Pekee Na Inapoangukiwa Siku Ya 'Arafah Au 'Ashuraa
- Ufafanuzi Wa Thawabu Za Sita Kama Kufunga Mwaka Mzima
- Kulipa Deni La Ramadhaan Na Sita Shawwaal
- Inafaa Kufunga Swawm Za Naafil (Sunnah) Kabla Ya Kulipa Deni La Ramadhaan?
- Kufunga Ijumaa Na Jumamosi Katika Sita Ya Shawwaal Yafaa
- Ufafanuzi Wa Thawabu Za Sitta Kama Kufunga Mwaka Mzima
Na Allaah Anajua zaidi
